السماح

اسمح لى

اكون لك زى الورقة البيضة

تكتب فيها ما تتمناه

انا فيه ناس سمتنى عبيط

من كتر الطيبة

و ناس قالوا

ان انا اخبث خلق الله

و انا......

مش عارف نفسى

انا اعرف بس

ان انا نفسى

امدد خيرى و شرى على سريرك

اتخبى ف حضنك

و اتشاهد

و اما تطبطب ايدك على راسى

و تقرا السورة

يخرجلك من موتى ....

حياة

ميدوزا

ميدوزا

بتدور على حد تلوشه

تسخطه تمثال



و هرقل

أنا شفته

قاعد ع القهوة

بيشكى قساوة الخلق

و وقف الحال



أما الواد أبو شعر ملزق

و لباس واقع على حجره

فدا قاعد بيفكر

أزاى ياخد جايزة

و يكسب مال



قام جالى نصحته

يرقص

يتنطط

يتعفرت

يلعب

يتشقلب

يتشقلط

يدى بتاعته لكل الناس
بلا ذوق
بلا رقة
بلا أحساس

و أما البنت مذيعة البرنامج
جت تعلن عن أسم الفايز
قام الواد بص لى
هزيت كتفى
و قلت ف سرى
مين عارف
جايز!!
و اما نطقت اسمه
و اعلن عن فوزه
ف كل الفضائيات
كلنا سقفنا و هيصنا
و نزلت
أغانينا الوطنية
ف كل الأذاعات
و ف وسط الزفة الكدابة
لمحت بطرف عينيا
ميدوزا
واقفة بعيد
لكن...و كأنها بتقرب
و لا حاسس حد من الناس المسطولة
ان الجو بيتكهرب
و ميدوزا
بتلعق شفايفها
بتتلمظ
و كأنها قطة سمينة
ف حضرة مليون فار
و عينيها بتبرق
خطاويها تقرب
أكتر
و أكتر
و أكتر
أما هرقل
أول مالمح المنظر
ابتدا يلطم على وشه
و يصرخ
يصرخ
يصرخ

و انا ما دريتش
الا و الفجر بيدن و يكبر
بسملت ف سرى
و قلت.....
خير..
خير...
خير....
ربنا يستر

ما يلزمنيش

أنا مش عاوز مصر

مصر

اللى بتهرب م الغنوة

و تخاف من كلمات الشاعر

مصر

الحرانة

الزهقانة

اللى بتقلع ف الصيف ع الأخر

أنا مش عايز مصر

عجوزة

و مهزوزة

و بطنها مكشوفة

لأى غريب

انا مش عايز اشوفها

حزينة

ضعيفة

واكلها الديب

انا مش عاوز اسمع اسمك

اللى انا باسمعه

دايما ييجى ف أخر اللستة

و انا ما اعرفشى

دا حكم الأيام

ولا دى أوهام

و لا احنا اللى خلاص

فلسنا

انا عايز مصر بتاعتى

مصر الحرية

مصر اللى ف يوم ضيقى

بتيجى

تطل عليا

أنا عايز مصر زمان

مصر الأهرام

مصر المتشامخة

مش مصر المتصابية

التعبانة

الشايخة

انا عايز مصر المنفتحة

مش عايز مصر المفتوحة

مصر اللى بأغنية

تداوى قلوبنا المجروحة

مصر بتاعة المسرح

و السيما

و ليل الحواديت

مش مصر المنصر

و الحرامية

و أسيادنا العفاريت

انا مش عايز مصر بتاعته

انا عايز مصر

بتاعة مصر

فاكر مصر

اللى انا باعشقها

و اللى انا من غيرها

ما باعر فنيش

أيه!!!!!

بتقول أيه

بح

ما فيش

طب أقولك

أنا مش عايز مصر

ما يلزمنيش

الصحاب و الأهل

الصحاب و الأهل

اللى كل واحد فيهم

جاب أزميل و شاكوش

و نقر الحتة بتاعته

ف قلب القلب

و مشى

أنا ليه

لو جبت ف سيرة واحد فيهم

باحس بعينه

بتزغدنى ف قلبى

ما باشوفهوش

أنما.......

باخرس

وباطاطى البصلة

و امشى

و انا مختشى

المراية

مرايتى

قوليلى يا مريتى

هو انا طالعالى قرون !!!!

هو انا انسان انسان

زى ما كنت

و زى ما باحلم اكون

طب انا دلوقتى باكلم نفسى

يبقى انا ايه

راجل مجنون

و انا لو مش طايق نفسى

و حاسس بغباوتى

عقلى

ينفع أغسله بصابون

مرايتى

و بجد انا اسف

كان نفسى كلامى يكون

عن حال الحب

ووجع القلب

و أصل الكون

عن كيف تهور

سعد اللمبى

و شد سيفون

عن حكم الشرع

ف واحد حط

ف شايه لمون

أى كلام

اى تقوقع

ف المتبرقع

اى جنون

ألا أنى يا مراية

لبست حزامى الناسف

و ركبت حصان الشعر المفتون

و دخلت ف أتخن حيطة

مكتوب على صدرها بنيون

أنا باقى

أنا معكم

أنا على قلبها لطولون

الشعر

سألونى

و بتكتب شعر

طب ليه

و أيه

أيه أصلا

يعنى الشعر ؟!!

فضحكت

الشعر

دا زى الدنيا

لأ الشعر دا دنيا

و ناس

الشاعر يكتب

يطلع أحساس

الشعر بيلمس وجع القلب

و يضرب ع الوتر الحساس

بالشعر تحب و تكره

تضحك و تكشر

بالشعر بتكتب و بتقرا

بالشعر تفكر

بالشعر انا ممكن

اقول اللى ف نفسى

ولو ان انا احيانا

بابقى جبان

بالشعر باهلفط مع نفسى

و ارجع للدنيا

مش زعلان

بالشعر فيه حاجة

بتطلع من جوة

و بتدى للعالم معنى

الشعر بيديلك قوة

تلعن ابو خاش اللى وجعنا

الشعر

و دا طبعا غير الشايع

مالوهش قواعد

الشعر اللى بجد

جنان

الشعر الواعد

راعد

الشعر الصادق

انسان

بير الحواديت

انا يا اللى عيونك ودتنى

لبير الحواديت

وعدتنى بنور

و زمان مسحور

و أميرة

جمالها بتتحاكى

بسحره الحواديت

ولأنى

عبيط و جرئ

و ف قلبى سذاجة طفل برئ

صدقت و جيت

و لقيتك واقفة

مدلية ضفيرتينك

و البدر ليلتها بيتدارى

و كأنه يغير من قمرينك

و عشان يا حبيبتى

أنا باعشق فيكى

غموضك و صراحتك

قربت أعاتبك و اصالحك

و اصالح فيكى الليل والبدر

و السحر اللى بيملى ملامحك

وأتاريكى

أول ما لمحتينى

مديتى ايديكى لأخرها

و الدعوة لحضنك منظرها

بيسر النفس المحزونة

ولأن الحسن بيغوى العين المفتونة

مديت الأيد ع الأيد

جهزت القلب لحلم بعيد

حضرت الحضن لحضن سعيد

و داريت أوهامك ف ملامحى

و سامحت ف أحضانك جرحى

و اتنهدت بعزم القلب

ياااااااااااااه

يا القلب الموجوع

ما تبات بعد اليوم بدموع

و حضنتك و جريت وياكى على البير

نغرق جوة الحواديت

يمكن ف حكاية أنتى الجنية

و أنا أصير وياكى أمير

و صحيت من حلمى لقيتك واقفة بعيد

و لقيتنى باموت م الدهشة وحيد

و أتارينى

مش أول حد بيغرق فيكى

و لا أول قربان يتقدم ع المذبح ليكى

بصيت لى و بصيت ع العشاق المتاعيس

و بمر الضحكة سألتك

انتى يا حبيبتى اللى فينوس

و لا احنا اللى طلعنا

جاموس

غموك يا حصان

غموك يا حصان

خلوك يا جميل

فارس عميان

يا خرااابى عليك

رهوان متهان !!!

غدار يا زمان

و يا ترى يا جميل

غاميينك ليه ؟

و قالولك أيه

علشان مصلحتك و لخيرك

و أهو ترجع لآهلك و لخيلك

حلو و كداب

و تفرح أهل و أحباب

و تجيب سرايات

و قصور

ويضوى النور برة الأعتاب

على كدة صدقت

ضحكوا عليك

بالفول و التبن

سرج جديد

و جرس بيرن

يا خرابى عليك

رهوان متهان

غدار يا زمان

بتدور و تلف

قلبك يقبض

و عينيك بترف

بس بترجع

و تدور و تلف

يمكن تزهق

تشخط

و تتف

بس هاترجع

من تانى تدور

ف ساقية

ف حنطور

و هاتفرق أيه

ما هو أخر الليل

تتحط لك

علاقة الفول

تاكل و تهف

و.......

تنام مسطول

عربية

زعق

أصرخ

ألطم على وشك

أحرق لك كام عربية

أشجب

ندد

و أحلف بالغالية

أن فلسطين

عربية

لو قادر

طلع جرنال

و أملاه بكلام

من صنف العزة العربية

و أعمل مؤتمرات للقمة

و أديها عياط

ف الكافيهات الفضائية

أو أمشى فى مسيرة حب

بس ماتنساش

يلزملك

علمين و .......

كوفية

بس... ماتستغربشى

لو يوم هاتقوم من نومك

تلقى بنى سويف

مستعمرة يهودية !!!!!!!!!!

طلب الرضيع من امه

تفرش ع المكان

أمان

و حب

و طبطبة

و تغنى غناويها القدام

و بلاش قصصها المرعبة

لو مدت البزة اليمين

يشبع عيالها الطيبين

و ان مدت البزة الشمال

يفرحوا باقى العيال

و يهون زماننا اللى اشترالنا

بدال غنانا

مندبة

طلب الرضيع من امه

تتلفت له

تحن له

و يا ريت كمان تعيش معاه

والعمر لسة ف أوله

وبلاش تسيبه للزمن

وبلاش تسيبه للمكن

وبلاش حكاوى الغول

و حصان مهول

سلق الصبايا ف مرجله

لكن يا ريت امه تفوق

دى بقالها قرن

مغيبة

الارض

لو حبلت أنين

تولد عذاب

الكلمة

تهرب م الكتاب

نصبح

نلاقى الفجر غاب

الدمعة

تاخد من حباب العين

وطن

يا أمنا

يا عرضنا

يا .... أرضنا

ما تصدقيش

لو قلنا نعشق بعضنا

و لا تحلميش

يرجع يخضر قلبنا

هى الصلاة

تنفع بناس تعبد وثن!!

لو تعرفوا

ان الكتابة ألم

أوجاع حبل

لحظة مخاض

كنتوا عملتوا لكل كلمة

................

حفلة ميلاد

هى الآيام معصورة
و لا القلب المكسور
بقى واقف وحده ف عز البرد
عريان مكسوف
و ليه يا عيوننا المفتوحة
ما احناش لاقيين الشوف
و لا دا حكم زماننا علينا
تدبل جوانا الأحلام
و يحل بدالها الخوف

أنا أخر يوم ف العمر
أتمنى
أرجع لحضانتى
و أركب مراجيح
و اتخبى ف وسط صحابى
و نضحك
نضحك بصحيح
و نغنى الغنوة اللى المس
قالتها زمان
عن فرخ فصيح
و يا سلاااااااام
يا سلام لو القى عجلتى
و أسابق الريح

و ف اخر اليوم
و انا راجع بيتنا
اتكن و اموت
و انا واقف قدام الباب
أتمنى
ما القاش المفاتيح!!!!!!!!!!!!!

فى القلب حاجات

ماباقولهاش

و باشوف منامات

و لا اطولهاش

عادى!!!!!!

بس اللى بيوجع بصحيح

لما اعرف ناس

و الاقينى

ماباعرفهاش

ساكت لسنينك ليه
بتمطوح فيك ؟
و عيونك .......
مش فاكرينك
و لا فاكرين
ان كنت سعيد
و لا الحزن
صبح عادة

ساكت.....
على سوط الظلم
و الصوت جواك
محبوس
و فضلت تنام
تحلم بالحلم
و لا بيزورك
الا .......
كابوس

حيث أن


حميدة عبد المستعان
كبير جنود حرس حدود
البرلمان
وقف نهق
نحنح شهق
و قال بيان

من بعد ما ابسمل
و اقول
عن ميت ولى و سلطان و.....
غول
و ألعن العصر اللى فات
و سنسفيل ابو اللى مات
و أنعى كام مليون شهيد
راحوا بالنار والحديد

أما بعد
حيث أن الدنيا جنة
و الطريق مفروش ورود
و المسائل ف الطراوة
و الخلايق ع العمود
يبقى كله ف الحلاوة
و الفساد
مالهوش وجود

حيث أن يا شبابنا
كلكم متورطين
يبقى حتما بالفكاكة
سنين ابوكو الجاية
طين
للى منكم راح يقاوح
أو يفتح ف ال........
تخين

اخر ليلة لشهرزاد

شهريار
انا عمرى ما انفع شهرزادك
و لا عمرى هابقى
فوق سرير القهر زادك
دا الهوى
مخالف معادنا
و العبيد دول
مش ولادنا
ارتفع فوق اعلى مادنة
تلقى دعوة و مقسومالك
ربنا
يهد اللى ظالم
و اللى فوق
اوجاعنا نايم
اعتلى تل الجماجم
برضه ليل الظلم حالك

برة الخط الأحمر


من قلب الأمة النابض
بالثكنات المسكونة
من قلب الحلم العابث
و الحركات المجنونة
من اجل القمر
النايم على روحه
و اللى اخدنا
ف حبه صابونة

من بعد الشوق و الذوق
والذى منه
و كلام ع الناس
اللى خلاص
م الغلب اتجنوا

مرسل ليكم
الف تحية
و احلى سلام
بمناسبة
اخر انجاز
ف عصور البلالم
و الترى لام
دا لان الانجاز
الساكن ف ضلوعنا
مزنوق ف الضلعة اياها
و بيوجعنا
و اللى هايغلط
ف اللى دبحنا
و اللى عشانه
بعنا ارواحنا
يبقى نهاره
سواد
مش فايت
شبه العيش
الطازة البايت
اللى اساسا
مش لاقيينه
و اللى هاينسى
هاتطلع عينه
يلا نغنى حطة يا بطة
دا احنا خلاص
اكلتنا القطة
حط ف عينك
حصوة ملح
حط ف ............
برميل شطة !!!!!!!!!!!!!!!!!!!!!!!!!!!!!!!

ماسك العصا م المنتصف
خايف تكون جريء
وخايف ترتجف
جواك أمل
يولد ألم
فتخاف
و لا شيء يختلف

يامنتهى الجبن
اللى كان
بيخوفك
تحلم بأن العمر جاى
يموتك
ترجع جبان
وتعيش عشان
تاكل
و تحلم بالخلف


الجبن يا بن العم حكمة
و اوعاك تصدق
أن الجبن
منتهى الأزمة
الجبن دا تقوى
ورع
الجبن نعمة


سايس لسانك
سوق حصانك
ع الهدف
أياك تسوق فيها
و تعمل منحرف
الجبن وحده
يحمى عقلك
م الخرف
بالجبن وحده
لا تنفلت
ولا تنحدف


يا بن الأصول
أعقل و قول
عاش الجبان
سيد الزمان
مالك مكان
سايس حصان
و انا لو جبان
كان اسمى بينكم ينعرف

أشتغالة

كراسة سودتها
بكلام و له معنى
و دماغى
ما وجعتها
بالشعر و المغنى
و راهنا ليه على وطن
و لا عمره هايساعنا


باحلم
يا أرض القوافى
و الحلم
طائر خرافى
كشف لى كل اللى خافى
و ف أخره
دمعنا


باحلم
وحلمى أشتغالة
دخلنى
حالة هبالة
وحبيبى
قال لى ف عجالة
حبك بيوجعنا

يا مساء الفل انا بقيت مدون حد يصدقها دى انا اصلا لسة بادور ع الحروف بصوا بقى انا عندى حاجات كتير تتقال بس باختصار عشان ماباحبش الرغى مع انى عامل المدونة دى عشان ارغى و اطلع كل اللى باحوش فيه من سنين عددها تلاتين
بس انا هاقول بطريقتى اللى اتمنى تعجبكم و لو ما عجبتش عادى اهى طريقتى و الرزق ع الرزاق

أول الكلام

حفلة ميلاد

لو تعرفوا

أن الكتابة

ألم

أوجاع حبل

لححظة مخاض

كنتوا عملتوا

لكل كلمة

حفلة ميلاد